Vil du vere med å skape verdi i lokalsamfunnet? Vi leitar etter deg som vil bidra til å styrke fellesskapet vårt gjennom frivillig innsats. Ditt engasjement kan skape stor verdi!

Vi er enormt takksame for alle frivillige vi har i Gjesdal. Dei gjer ein strålande innsats for lokalsamfunnet og bygger relasjonar og trygge møteplassar for innbyggarar i alle aldre. Vi har plass til endå fleire frivillige, og vil gjerne invitere til ein kveld for å kickstarte nye frivillige i Gjesdal. Her kan ein kome om ein er nysgjerrig på kva Frivilligsentralen i Gjesdal jobbar med, om ein vurderer å bli frivillig, eller om ein alt har bestemt seg for å bli frivillig.

Å melde seg som frivillig i Gjesdal kan innebere mykje. Det kan vere å delta i ein aktivitet som allereie finst – vi treng fleire natteravnar, fleire frivillige som hjelper til med barne- og ungdomsarbeid, fleire besøksvener og turvener, fleire sjåførar til transportsyklar, frivillige som kan bidra i arrangementsteam på Veveriet og mykje meir. Men! Det kan jo også hende ein har ein ny idé? Kanskje ein brenn inne med ein tanke om eit samlingspunkt ein føler manglar i Gjesdal? Vi kan kople saman frivillige for å skape fleire arenaer, og vi kan også vere eit koplingspunkt inn mot lag- og foreiningar. Her er det altså mykje ein kan bidra med.

Å vere frivillig gir ny meining, og er verkeleg med å styrke fellesskapet. Vi oppmodar derfor til å ta turen, slik at fleire kan få kjenne på den gode kjensla det gir å vere frivillig.

Vi inviterer til informasjonsmøte om frivillig innsats i Gjesdal. 
Dato: 11. september 
Tid: 18:00 - 20:00 
Stad: Veveriet, møteplassen i 1. etasje

Velkomen!